Español(Spanish Formal International)Nederlands (NL-nl)Papiamentu (Curacao)English (United Kingdom)

Bureau for Intellectual Property

Patent


Protekshon di patènt

Un patènt ta e derecho eksklusivo di un inventor pa komersialisá su invento sin miedu di kompetensia di otronan, i asina haña tur posibel benefisio di e invento. Ora lesa esaki e siguiente preguntanan por surgi.

Kiko ta e posibel benefishinan ora bo tin patènt riba un invento?
Protekshon di kreashon di un invenshon pa medio di patènt tin vários bentaha. Un ehèmpel ta ganamentu di un premio pa e invenshon òf gana un kaso den korte kontra un kompetidor. Konsekuentemente, ta importante pa bo ta konsiente di e echo ku derechi riba patènt ta duna inventornan e posibilidat pa eksplotá nan invento libremente. Anto si e invento ta un éksito riba merkado, esei por resultá den enrikesimentu finansiero di e inventor, pasobra e inventor ta e úniko persona ku tin e derechi di komersialisá e invento. Teniendo esaki na mente, ken ku tin un idea interesante mester buska manera di haña sufisiente informashon tokante protekshon di patènt. Tur hende por inventá algu nobo ku ta útil i saludabel pa e hendenan riba e planeta aki. Hasiendo esei, inventornan ta kontribuí pa mehorá kondishon di bida riba mundu.


Derechi riba Patènt

Derechi riba patènt ta e derechi eksklusivo di un inventor di un produkto nobo òf di un proseso industrial nobo pa komersialisá e invento durante un sierto periodo.
Lei ta indiká ku un invenshon mester kumpli ku tres eksigensia pa e por bini na remarke pa protekshon pa medio di un patènt. E eksigensianan ei ta enserá ku un invenshon mester ta nobo, basá riba aktividat inventivo i por keda apliká riba tereno di industria. Den kaso di un invenshon nobo mester ta kla ku e invenshon no tabata konosí promé. Pa loke ta trata aktividat inventivo, mester ta kla ku e invenshon tabata un resultado sorpresivo di e inventor su trabou. I pa loke ta trata aplikabilidat, esaki ke men ku por fabriká e invento den kuadro di tráfiko ekonómiko.
Sin embargo, komo konsekuensia di nos sistema regulashon eksistente, ta dunando patènt ku no ta kumpli ku unu òf mas di e eksigensianan aki. Kontròl riba valides di e patènt ta kai bou di kompetensia di e huesnan di patènt na La Haya den kasonan den korte tokante e asuntu aki.


Regulashon di Patènt

Dia promé di aprel 1995 e Lei di Patènt di Reino di 1995 a drenta na vigor. E lei aki ta mara Kòrsou. E lei aki ta regulá e derechinan riba patènt. Un patènt ku a duna a base di e lei aki, ta bálido tantu na Hulanda komo na Antia Hulandes pero for di 10 di òktober 2010 Kòrsou tin su mes hurisdikshon. Na Hulanda ta atministrá solisitut pa patènt na e Sentro di patènt na Den Haag. E doño di patènt ta optené e derechi riba patènt for di Gobièrnu di Reino Hulandes.
Di akuerdo ku e stipulashonnan den artíkulo 100, párafo 1 di e Lei di Patènt di Reino di 1995 por entregá solisitut pa patènt na Ofisina pa Propiedat Intelektual di Kòrsou.
Tambe por solisitá pa protekshon di patènt, hasiendo uso di e Tratado Oropeo di Patènt. E Tratado Oropeo di Patènt a drenta na vigor na 2002. A base di e tratado aki por optené protekshon di patènt pa medio di un solo solisitut na diferente pais oropeo. E prosedura pa haña un patènt oropeo por dura 3 te 4 aña, komo promé ku duna e patènt e outoridatnan ta investigá si e invenshon ta kumpli ku e eksigensianan di novedat, inventividat i aplikabilidat. Sin embargo, e patènt ku ta otorgá ta un patènt nashonal ku ta kai bou di regulashon di e lei nashonal di e diferente paisnan oropeo kaminda a pidi protekshon.


E proseso di solisitut

Solisitantenan mester kòrda ku un solisitut pa patènt mester kumpli ku hopi formalidat. Solisitantenan mester duna e formalidatnan aki e atenshon nesesario pa sigurá ku nan solisitut ta korekto. Mester yena e formulario di solisitut na hulandes. Sin embargo, for di 5 di yüni 2008 por entregá deskripshon di e solisitut pa patènt na ingles. E konklushonnan di solisitut pa patènt si mester entregá na hulandes ainda. Mester entregá e solisitut pa patènt na Ofisina pa Propiedat Intelektual i e mester kontené e siguiente datonan:

  • nòmber i adrès di e solisitante,
  • nòmber i residensia di e persona ku a hasi e invenshon, a ménos ku e último aki, manera poné den un deklarashon por eskrito komo anekso di e solisitut, no ta deseá di ser menshoná den e patènt komo e inventor,
  • un petishon pa optené un patènt,
  • un indikashon kòrtiku di ophetivo di e invenshon,
  • huntu ku e solisitut mester tin un deskripshon di e invenshon, ku ta sera ku un òf mas konklushon, i un deskripshon di e opheto pa kua ta solisitá un derecho eksklusivo
  • huntu ku e solisitut mester tin un ekstrakto di e deskripshon,
  • si ta nesesario, algun pintura pa ilustrá e invento
E posibilidat pa haña un patènt pa 6 aña no ta eksistí mas, komo konsekuensia di un kambio den lei ku a drenta na vigor dia 5 di yüni 2008. Motibu di esei ta ku e usuarionan ta haña ku e ta duna muchu tiki siguridat legal riba valides di e patènt.  Konsekuentemente, awor tur solisitante di patènt mester pidi un investigashon di novedat dentro di diestres luna despues di e fecha di e solisitut. Patènt ku un durashon di 20 aña ta e úniko posibilidat ku a keda solisitantenan pa patènt.

Despues di risibí e formulario di solisitut OPI ta mand’é pa outoridatnan hulandes na Hulanda ku ta responsabel pa atministrashon mas aleu i registrashon di e invenshon. Si tur kos ta yená korektamente, na final di e proseso OPI ta haña un sertifikado di patènt ku ta indiká ku ta otorgá e patènt.

Por fabor klik aki pa bo tuma kontakto ku nos pa bo risibi un formulario di aplikashon pa registrashon di patènt. (solamente disponibel na hulandes).